Hvað er Skerpa stéttarfélag og hvað gerum við?
Skerpa telur vel yfir 2400 félaga.
Félag sýningarmanna við kvikmyndahús, Félag kvikmyndagerðarmanna og Félag tæknifólks í rafiðnaði tóku höndum saman og mynduðu eitt stórt og sterkt félag saman, félag tæknifólks FTF árið 2021. Árið 2024 sameinuðust Félag tæknifólks og Félag íslenskra símamanna og á aðalfundi sameinaðs félags árið 2025 var kynnt nýtt nafn félagsins: Skerpa.
Félagið heldur utan um félaga sína sem starfa í mörgum greinum á fjölmörgum vinnustöðum og gætir hagsmuna þeirra sem snúa að vinnuveitanda.
Félagið leggur sig fram um að styrkja félaga sína til vaxtar í sínum störfum með því að bjóða upp á endurmenntun sem þjónar þeim, á sínum vegum eða/og í samstarfi við aðrar menntastofnanir.
Félagið semur um kaup og kjör á vinnumarkaðnum fyrir félaga sína með Rafiðnaðarsambandi Íslands (RSÍ).
Félagið, með aðild að RSÍ, styrkir félaga sína út frá þeim reglum sem um sameiginlega sjóði sambandsins og aðildarfélaga þeirra gilda hverju sinni.
Félagar hafa fullan aðgang að orlofskerfi, afsláttarkerfi og öðrum sjóðum RSÍ auk viðburða sem RSÍ stendur fyrir.
FTR ➝ FTF ➝ Skerpa
Félag tæknifólks í rafiðnaði var stofnað 6. apríl 1993 þegar þekking, reynsla og ekki síst sérnám erlendis fór að verða meira áberandi í starfsumsóknum um hin ýmsu störf t.d. í fjölmiðlaheiminum, leikhúsunum og víðar. Í réttindabaráttu jafnt og á faglega sviðinu hefur félagið haft sitthvað til málanna að leggja, en það var ekki fyrr en 1995 að það varð fullgilt stéttarfélag innan Rafiðnaðarsambands Íslands.
Stofnfélagar voru þeir starfsmenn Ríkisútvarpsins, Þjóðleikhússins og Íslenska útvarpsfélagsins sem ekki voru Iðnskólagengnir en störfuðu eins og Iðnskólagengnir starfsmenn þessara fyrirtækja. Stofnfélagar höfðu margir hverjir aflað sér sérfræðiþekkingar í faginu með ólíkum hætti og fannst réttilega, þeir ekki metnir inn til launa samkvæmt því.
Árið 1997 átti félagið fyrst fulltrúa í samninganefndum Rafiðnaðarsambandsins og hefur félagið síðan unnið jafnt og þétt að því að öll tæknistörf sem undir félagið heyra séu varin að kjarasamningi, uppbyggingu endurmenntunar fyrir félagsmenn og almennt beitt sér fyrir viðurkenningu á þeirri hæfni og þekkingu sem félagsmenn hafa aflað sér.
Inn í Félag tæknifólks í rafiðnaði gekk Félag sýningarstjóra við kvikmyndahús, kjaradeild Félags kvikmyndagerðarmanna og breyttist nafnið í Félag tæknifólks við þær breytingar. Árið 2025 sameinuðust svo Félag íslenzkra símamanna sem stofnað var árið 1915 og Félag tæknifólks og á aðalfundi sameinaðra félaga var samþykkt nýtt nafn félagsins, Skerpa.
Skerpa er aðili að almennum tæknigreinasamningi Rafiðnaðarsambands Íslands við Samtök atvinnulífsins vegna Skerpu – Félags tæknifólks, auk fjölda sérkjarasamninga, vinnustaðasamninga og samninga við ríki og sveitarfélög. Skerpa er annað stærsta aðildarfélag Rafiðnaðarsambands Íslands.